رسالة لكل شباب خريجي كليات محافظة دمياط

محافظة دمياط

محافظة دمياط

كتب أحد القراء الشباب خطابا ووجه إلي خريجي الكليات من أبناء محافظة دمياط . واليكم نص هذا الخطاب :

مع كامل احترامى وتقديرى للمسئولين المحترمين تحياتى وتقديرى لكل المحترمين والمحترمات من خريجى جميع الكليات وخاصة تربية … المفروض ان الجميع يكون اتعلم الدرس كويس جدا ويفهم ان مفيش حد بياخد حقوقه المشروعة غير لما يطالب بيها طالما ده حق مشروع

ليه وبدون ما يضر بأى شىء …. الحقيقة كنت مستنى من الشباب الجامعيين والشابات انهم ينظموا وقفة احتجاجية أمام المحافظة كمظاهرة سلمية جامعية ونتقدم كلنا للمحافظ و نتكلم معاه فيس تو فيس مش على الفيس !!!!! مع احترامى للجميع اللى بيجاهدوا فى سبيل تعيينهم ! والله مش عارف أهزر والا أتكلم بجد دولة فى كل محافظاتها خريجين جامعيين وشباب وبنات واعى ومتعلم حاصلين على ليسانس أو بكالوريوس أو…. ومش عارفين يجيبوا حقوقهم … الكل بياخد حقوقه المشروعة عن طريق المظاهرات أو الاعتصامات والكل بقى مدرك الشىء ده سواء احنا أو المسئولين مع كامل الاحترام والتقدير للجميع .

يعنى لا تعيين هنا ولا فيه مجال لسفر الخريجين بجميع تخصصاتهم انهم يشتغلوا بشهادتهم الجامعية دى فى أى دولة من الدول بيعينوا دلوقتى فى سنة 2000 فى المستقبل ان شاء الله القريب بعد معاناة دامت سنين يعنى لما يعينوا خريجى 2011 مثلا أو 2012 ان شاء الله دول اللى أكيد هيعانوا أكتر ….

المفروض نتعلم من الثورة شىء ان صوتنا لازم يوصل للمسئولين واحنا كلنا مجتمعين فى شبة مظاهرة سلمية من الخريجين والخريجات الجامعيين لتعيين الجميع مع العلم ان فيه تخصصات كتير فى المدارس فيها عجز فى المدرسين و فى مدارس خاصة بيتعين فيها فئات بالمحسوبيات نفس الكلام فى المدارس الحكومية … أنا أعرف ناس خريجى تجارة وبيدرسوا فى مدارس بتخصص مختلف خالص عن تخصصه … وبيختاروا شوية من سنين مختلفة للتعيين أنا مع الكل انهم يتعينوا بمختلف تخصصاتهم و سنين تخرجهم اما فى مدارس فى البلد دى أو يفتحولنا مجال للسفر والتدريس فى أى دولة

 فيه ناس بتسافر دول عربية وبيتقدموا بشهادتهم لأى مدرسة حكومية أو خاصة وبيتم تعينهم فى المدارس حتى لو مش معاهم شهادات خبرة مع اختبار قدراتهم و مش عايز أقول لو كنا طالبنا بحقوقنا كل اللى اتخرج يتعين فى سنة تخرجه مكناش وصلنا للعدد الهائل من المحترمين والمحترمات اللى لغاية دلوقتى بيستنوا المسئولين يعينوا مدرسين ومدرسات على الخصوص من سنين عدت …

المفروض اننا نطالب بحقوقنا المشروعة ونقابل المحافظ المحترم ونطلب منه تعيين الجميع فى مدارس كتير بها نقص فى المدرسين لدرجة ان فيه مدرسين بيدرسوا كذا مادة فى الوقت نفسه … أو يساعد الخريجين انهم يسافروا يعنى لو الدكتور مرسى مشكورا بيقدم المساعدة لطلاب سوريا الشقيقة وأهلها الكرام بتعيين البعض منهم فى تركيا بعد مشاورات مع تركيا …. بطلب من سيادته فى الوقت نفسه ان يقدم لشباب مصر المحترمين والمحترمات المساعدة لتسهيل تعيين المصريين الكفء بكامل تخصصاتهم وهم كثر بدون أدنى شك الى الدول الشقيقة للاستفادة من كفائتنا لان الدولة حتى الان لم تقدر الكفء فيها من جميع التخصصات فى دولتنا …

بتمنى من كل محترم ومحترمة انهم يتجمعوا ويطالبوا بحقوقهم خصوصا ان المحافظ المحترم اللواء محمد على فليفل محافظ دمياط من المحافظين اللذين لم يتم تغييرهم فى أماكن أخرى ….؟ مظاهرة سليمة من الجميع باحترام يوم فى التانى فى التالت ومش هيزيدم هتلاقوا فرص عمل كتير جدا فى مدارس كتير بس المسئولين مش بيتحركوا غير لما يلاقوا نفسهم فى موقف لابد من اصدار قرار فيه … أنا مش بطالب بالاعتصام امام محافظة دمياط يوم واتنين لان ده بيضر بالمصالح العامة بس بطلب بعمل مظاهرة سلمية من كامل التخصصات المحترمين منهم والمحترمات أمام مقر المحافظة لغاية ما نقابل المحافظ الفاضل متجمعين ونطالب بحقوقنا المشروعة اللى والله لو اتحدنا وطالبنا بيها بقوة هتلاقوها اتحققت فى بعض أيام بس لازم نطلب حقوقنا بطريقة سلمية مشروعة …. مع كامل تحياتى واحترامى للجميع


مقالات ذات صلة